Mbi 1.6 milion besimtarë myslimanë nga e gjithë bota janë mbledhur sot në rrafshnaltën e Arafatit për të marrë pjesë në kulmin e pelegrinazhit të Haxhit, një nga ngjarjet më të rëndësishme fetare në Islam.
Haxhilerët u drejtuan drejt rrafshnaltës së Arafatit, pranë qytetit të shenjtë të Mekës, ku zhvillohet rituali më i rëndësishëm i Haxhit. Besimtarët kaluan orë të tëra në lutje, meditim dhe reflektim shpirtëror, duke kërkuar falje dhe mëshirë hyjnore.
Autoritetet saudite kanë ndërmarrë masa të gjera sigurie dhe organizimi për të menaxhuar fluksin e madh të pelegrinëve, duke përfshirë shërbime mjekësore, monitorim të temperaturave të larta dhe koordinim të transportit. Temperaturat në rajon kanë qenë shumë të larta, çka ka shtuar kujdesin për sigurinë dhe shëndetin e pjesëmarrësve.
Haxhi është një nga pesë shtyllat e Islamit dhe çdo mysliman që ka mundësi fizike dhe financiare është i obliguar ta kryejë të paktën një herë në jetë. Pelegrinazhi simbolizon unitetin, barazinë dhe përkushtimin shpirtëror të myslimanëve në mbarë botën.
Pas ritualit në Arafat, pelegrinët do të vazhdojnë ceremonitë e tjera tradicionale të Haxhit, përfshirë qëndrimin në Muzdelife dhe ritualin e gjuajtjes së gurëve në Mina.