Forumi Rinor Islam në Maqedoni dënon ashpër fyerjet të cilat iu bënë fesë islame dhe muslimanëve nga disa persona (apo grupe) të pandërgjegjshëm që duan të prishin marëdhëniet e mira ndërfetare në mesin e popullatës së Maqedonisë e që kanë qenë shembull për rajonin dhe duhet të vazhdojnë të mbeten si të tilla.

Për ne është e papranueshme çdo lloj fyerje dhe urrejtje ndaj fesë islame dhe ndaj çdo feje tjetër, duke u tallur me parimet dhe normat themelore të feve, sepse aktet e tilla të papërgjegjshme mund të shpiejnë deri në probleme dhe incidente të paparashikueshme, që do ta dëmtonin në masë të madhe harmoninë, tolerancën dhe bashkëjetesën e shkëlqyeshme disa shekullore në këto troje. Gjithashtu I njoftojmë të gjithë ata qëllimkëqinjë se feja islame është shumë larg nga etiketimet e tilla banale dhe keqëdashëse. Pamjet dhe skenat që u shfaqën në Festivalin e Vevçanit ishin tronditëse, shokuese dhe joetike, e më e keqja është se ky festival financohet nga Ministria e kulturës, para këto që mblidhen edhe nga tatimpaguesit muslimanë të këtij shteti dhe ky institucion nuk e pa të arsyeshme të dalë me reagim apo ndonjë formë tjetër të mospajtimit me veprimet e paraqitura në këtë eveniment të turpshëm.
Kërkojmë që organet shtetërore të marrin masa adekuate, e në veçanti nga Ministria e Kulturës që të distancohet nga këto akte dhe të kërkojë që të ndërprejë finansimin e këso lloj aktivitetesh që fyejnë të tjerët dhe ndjellin urejtje ndërfetare. Njëherit kërkojmë nga organet e rendit që të marrin masat e duhura për iniciatorët e këtij incidenti që para syve të opinionit publik e çka është më e keqja në mesin e fëmijëve paraqesin pamje që nuk përkojnë me moshën e tyre.
Forumi Rinor Islam do të promovojë në vazhdimësi vlerat e mirëfillta islame dhe njerëzore, si dhe do të ngrejë çdoherë zërin kundër “vlerave” çoroditëse që mundohet t’i imponojë dikush duke fyer mbi parimet dhe identitetin e tjetrit. U bëjmë thirje edhe përfaqësuesve të muslimanëve që kanë marrë votat e popullatës muslimane në vend që të dalin publikisht dhe të kërkojnë llogari për këto raste, sepse ky është obligim i tyre moral dhe njerëzorë.



Forumi Rinor Islam
Shkup, 26.01.2012
Zyra për Marrëdhënie me Publikun pranë FRI-së